Wednesday 24 December 2014

Roj ek baat - 004

Wo Lucknow ki ek yaad (part-2)

Charbaag railway station ke saamne ek restaurant hai 'Milan Restaurant ' jaha mai pichle 5 saalo se jab kabhi Lucknow jaata hu pet puja karta hu......is baar bhi wahi gaya aur ittefaqan har baar ki tarah is bar bhi table no 4 mere liye khali thi....ab jaade ka mausam aur menu card ke bajay bahar lage hoarding se hi pata chal gaya ho ki khaane me 'Makke di roti aur Sarson Ka Saag' ho to kaun kambakht menu card pe time waste karega..lo ji aa gaya makkhan se sarabor desi punjabi zaayakedaar khaana.....'ye aaya wo gaya...jaane kaha kho gaya...' Bilkul isi gaane ki tarj pe teesri roti bhi pet ke andar aur jab bhara ho pet to hum sikandar.....sab kuch bilkul thik chal raha tha..bilkul thik.....maa ko bhi bata diya tha ki unki aagya ka paalan karte hue maine khana kha liya hai jisse wo bhi khana kha le....lekin tabhi pariksha ki ghadi chalu ho gayi...90 ₹ ka bill dene ke liye jaise hi maine apni jeb ko apne batue ki talaash me tatola....to us bhari thand me saara makhhan jo kuch der pehle maine ungliya chaat kar pet ke hawale kiya tha wo pasina bankar mere maathe par wapas aa gaya....bataua apne niyat sthan par nahi tha....niyat sthan kya wo kahi nahi tha....pure din ki jagaho ka flashback ek saath mere dimag me aa gaya tha.....khair mujhe jeb tatolte dekh manager saab meri stithi samajh chuke the aur mai bhi 'ab kya hoga?' Aur 'ab kya karu?' Jaise sawalo se jung lad raha tha.....manager saab ne mujhe ek nazar dekha aur kaha 'sir aap aaram se baithiye....Suresh sir ko gud aur paani do'...mai bilkul achhe bachhe ki tarah unki baat masnte hue baith gaya aur unhi do sawalo se ladta hua gud ek haath me liye baitha tha aur teesra paani ka glass khaali kar chuka tha...tabhi manager saab ne nehle pe dehla de maara aur kaha ki ' sir aap ticket ke paise mujhe lekar apne ghar jaaiye mai aapki diqqat samajh sakta hu'....
Unki baato ko sunkar mai aur mera swaabhimaan aapas me sannatedar behas kar rahe the aur mera antarman baar baar mujhe kos raha tha aur daantte hue yahi keh raha tha ki 'tumse ek batua nahi sambhala gaya...duniyadari ke bojh tum khaak sambhal paaoge' aur mai baar baar apni ki gayi galti ki maafi maang raha tha aur pachtava jahir kar raha tha...
Itni kasamkas thik na thi ki ye kalmuha phone aur dahade maarne laga...wo bhi ek unknown number ka phone.....maine apna phone silent kiya aur use wahi table par rakhte hue paani ka chautha glass pe gayak gaya....par ye phone aaj apni waali karne par aamada tha....ek baar phir wahi unknown number.....maine phone uthate hi thodi bhaati aawaj me kaha 'Haanji kaun aur kisse baat karni hai?'.......udhar se aawaj aayi 'Mai Karim bol raha hu...kya mai Aaditya ji se baat kar sakta hu?' Maine kaha 'kaun Karim?' Wo bola 'Mai Karim auto driver aap mere auto se charbaag station aaye the sur...kuch yaad aaya?' Maine kaha 'ha bhai yaad aaya..batao'..
Fir jo uske alfaaj the unhe sunkar mai apni kursi chhodkar khada ho gaya tha.....Karim ne kaha 'Aapka batua meri gaadi me reh gaya hai sir...maaf kijiyega maine use khol liya aur usme aapka card tha jisme se maine aapka number liya hai....mai chaarbaag ke saamne khada hu aap apna batua le lijiye '
Maine apne kaano pe yakeen na karte hue ek baar fir se usse wahi sab pucha jo wo bata chuka tha...aur apne saamaan ki chinta chhod ke mai badhawaas sa uske bataye hui jagah ki taraf badh gaya...aur waha Karim ya kahiye Lucknow ki shaan Karim khada idhar udhar meri raah dekh raha tha...aur jaise hi usne mujhe aur maine use dekha mujhse jyada uski aankhon me chamak aa gayi thi...chamak kahiye ya fir santosh ka bhaav...khair usne mujhe mera batua lautaya..maine use aupcharik dhanyawad aur uske ehsaan ki kimat shabdo se batai...mai Karim ko jabardasti 'Milan restaurant ' me le gaya aur manager ko pura mamla samjhaya.....Manager saab ne kaha 'Karim tumne Lucknow ki ijjat bacha li aaj raat ka khana meri taraf se tum yahi kha kar jaaogey...'
Kayi baar mana karne ke bawjood humaari zid pr Karim ne khana khaya aur fir hum dono manager saab ka dhanyavad ada karte hue restaurant se nikle...ab mai station ki taraf badh raha tha...maine Karim se vida lete hue batue se 500₹ nikalte hue uski taraf badhaye aur apna 'Financial thank you ' kehne ki kosis karne laga...Karim ne jo kaha wo kuch ye tha 'Sahab mai garib aadmi hu..padha likha hu..naukri nahi mili to apna aur parivar ka pet bharne ke liye auto chalane laga...mai jaanta hu ki agar mai aapka batua nahi lautaya hota to bhi aap mujhe doondh nahi paatey aur niraash pareshaan hokar kisi tarah apne ghar pahuchte...lekin agar maine wo batua rakh liya hota to mai khud ki,apne ghar se mile sanskaaro ki nazaro me gir jaata aur shayad kal jab mai gaadi ke sheeshe me piche baithi sawaari ko dekhta to mujhe aapka chehra dikhayi deta...aur wo chehra mujhse kehta ki Karim tu beimaan hai...mai itna bada bojh lekar nahi chal pata...isliye dhanyavad aapko jo aapne mujhe itne bade bojh tale dabne se bachaya....ab chalta hu saab ghar waale meri raah dekh rahe honge...Allah Hafiz...'
Aur Karim apne raaste chala gaya...par mai wahi sadak pe use jaate dekhta raha..mere jehan me abhi bhi uska kaha har ek alfaaz gunj raha tha...aur mai yahi soch raha tha ki shayad insaaniyat abhi mari nahi hai...wo bahut kam reh gayi hai...par hai jarur...chahe wo manager saab ho ya fir Karim....
Khair Lucknow se 'Rewadi aur Gazak' ke alawa mai Insaaniyat,bharosa aur imaandaari in sab ka ek complete package Karim ya fir kahe ki ' Lucknow ki ek yaad' lekar apne ghar laut chuka tha...par Lucknow ka wo anokha tohfa Lucknow ki wo kabhi na bhuli ja sakne waali ek yaad mujhe hamesha yaad rahegi.....
To dosto ye thi ek yaad ko sabdo me piro ke pesh karne ki ek kosis...
Fir milte hai ek nayi baat ke saath..
Ek naye din...
Aapke sujhao evam margadarshan ka intezaar rahega...
Tab tak liye dhanyavad evam namaskar....

Tuesday 23 December 2014

Roj ek baat - 003

Wo Lucknow ki ek yaad (part-1)

Wo kabhi kabhi hum anjaane me dialogue maar jaate hai na ki insaaniyat abhi mari nahi isi baat ke ird gird ghumti hai aaj ki ye baat....
Lucknow...ji ha shuruat karte hai thodi si nawaabi ke saath...
Lucknow jisme wo dum hai jo barbas aapko apna bana leta hai...chahe wo puraani virasat ho ya 21st century ka modernization ho....aap 'Imambaade' se shuru kijiye...ya aap 'Saharaganj Mall' ko hi le lijiye...aah in sabke bich kahi 'Hazratganj' ki black N white coding ko mat bhul jaaiyega....chidiyaghar ka 'Tillu' baagh ho ya fir haathi park ke patthar ke 'Haathi'.....sab kuch hai yaha ...haa shayad sab kuch......lekin wo hota hai na jise hum dusra pehlu kehte hai...are wahi 'Head N Tail' type...Lucknow ka mijaj bhi kuch aisa hi hai.......
Aaj jab December ki ek behad thandi subah Bhartiya Railway ki 3 ghante ki majboori ke baad mai jab sarjamin-e-Lucknow me daakhil hua to man me bus ek hi khayal tha 'kitni thand hai'...thand ki wajah se dimaag ne bhi jyada vaicharik hone se saaf inkaar kar diya...wo mahaj pratyaksh pehlu jo ki thand tha sirf usi par gaur farma raha tha....khair mai aagey badha aur is saansarik mohmaya ke bich fasi hui kuch zimmedariyon ko nibhane laga aur dekhte dekhte shaam ho gayi...wo suraj jo aaj pure din dikha hi nahi tha wo bina dikhe hi shaam ke aagosh me sama gaya....
Naitik zimmedariyon ke baad ek yuva hriday shaam hote hi atkheliya karne laga Qki ise chahe laakh samjhao...laakh pehre lagao....kitna bhi bewkuf banao ue rehta wahi hai...aapka apna 'chanchal...bebak....natkhat....baat na maan ne waala...bechara Dil'....
Mai apne dil ki baato me aa gaya aur 'Amir khan ji' ke behtarin abhinay waali ek shaandaar film 'PK' dekhne 'Saharaganj Mall' chala gaya....lo ji film bhi khatam ho gayi aur fir ek kaali shyaah raat ka daaman sir pe tha....ab kya karein...aji karna kya tha...yaad to atlast ghar hi aata hai na....ab waha bhi to jana tha...lekin 10 bajte bajte maa ki ek baat yaad aa gayi 'beta 100 kaam chhod ke khana aur 1000 kaam chhod ke nahana'....ab mere paas choice thi ki khau ya nahau...aur maine...ji ha khane ko hi chuna...auto rickshaw se chaarbaag station utra aur ek dhanyavad ke saath maine tay ki gayi rakam ada ki...is thand me us auto driver ne mujhe yaha tak chhod k bhale hi apna rojmarra ka kaam kiya ho lekin mere liye wo ek sahasik aur chunauti bhara kaam tha...khair me paise dekar jaldibaaji me apna batua jeb k hawale karte hue piche se apna saaman lekar apni manjil yaani pet puja kendra ki taraf badha.....
To be continued......

Tuesday 16 December 2014

Roj ek baat-002

Ek haseen shaam

Ek haseen shaam jo ki bahut se logo ka is busy si life me na chahte hue bhi ek adhura sa khwaab ban gaya hai...ji ha wahi haseen shaam...
Jiske baare me sochte hi ek bhini bhini sard hawao waali ek halki roshni waali ek shaam...jab aap ho...wo ho jo is sard shaam ko bhi haseen banaye aur saath me chai ke saath duba ke ki jaane waali wo baatein....bilkul wahi filmo waali romantic shaam...
Aaditya us shaam badi mushkil se khud ko kaam se faarig kar paaya tha aur jaldibaazi me apna kaam chhod ke office se nikla tha...office kya  yu kahiye ki uski personal jail..jaha pe wo har subah khud ko surrender karta tha aur har shaam ko farar ho jaata tha...ye silsila badastur kai mahino se jaari tha...Khair kisi tarah wo farar hua aur apni semi luxurious palace yaani apne kiraye ke kamare pe jo ki usne apne ghar se bahut dur aake apna sir chupane aur peeth tikaane ke liye 5000₹ per month pe sharma ji se kiraye par liya tha,Ki taraf badhne laga...par aaj uski manzil uska kamra nahi thi..kamre ki priority aaj dusre paydaan pe khisak chuki thi..aaj pehle paydan pe tha wo mandir jiske baare me usne apni maa ko phone pe bataya tha..aur uski maa ne khaaskar aaj use waha jaane ka hukm sunaya tha....aur sunati bhi kyu nahi aaj uske naalayak ka janmdin jo tha...
Aaditya maa ki baat maan chuka tha aur shaam ki aadhi aarti khatam ho jaane ke baad wo mandir me pahuch chuka tha aur thake man aur tute badan ke saath wo bhagwan ke saamne aankhein munde khada tha...khair jaise taise aarti khatam hui aur wo prasad lene pujari ji ke paas pahucha aur unhe bataya ki "pujaari ji aaj mera janmdin hai ye prasad aaj mere naam pe chadhaiyega....."...khair pujaari ji ke andar ka pandit puri taaqat ke saath bahar aaya aur unhone mantro ki ek lambi si list bhagwaan ke kaano tak Aaditya ka naam lekar daal di....maano month end me 1 hafte ki leave sanction karwaane boss ke saamne khade ho...pujaari ji ne uchit bill yaani daxina ke baad use prasad diya aur kaha 'khush raho....chiranjivi bhava'....aur shayad bhagwaan ne application turant sign kar di...kyuki Aadityajaise hi prasad leke piche ghuma uske saamne wo shaks khada tha jo uske liye 'the best gift of the day' se kam nahi tha......Tamanna....ha yahi to naam tha...Meri Tamanna....aur wo bus bebaki se musukura rahi thi...hua bilkul wahi jo filmo me hota hai....to hum emotions cut karte hue seedhe aate hai 'càfe coffee day' ki table par jaha Aaditya aur Tamanna apni coffee ka order deke uske aane ka intezaar kar rahe the...
'Happy b'day once again aadi' 17 vi baar Tamanna ne aadi yaani Aaditya ko wish kiya...shayad kya baat kare is udhedbun me use aur kuch sujh hi nahi raha tha.....Abki baar Aaditya ne mauka na gavate hue apne dil ki baat kahi...'Tammy I missed u alot yaar'...
Tamanna kuch kehti isse pehle ek awaj aayi....jo uski baaton ko wahi ek comma laga gayi...'your order sir'....coffee aa chuki thi...dono ne apni coffe ko cup se kam karna shuru kiya...bahar ka halka sard mausam,haath me garam coffee aur dil me laakho baato ke saath Aaditya ne pucha 'Vinay kaise hai?'...'wo bilkul thik hai aur mujhse bahut pyaar bhi karte hai..' Bina Aaditya ke puche ye bhi batana ki Vinay yani Tamannake pati dev unse bahut pyaar karte hai ne ye saaf bata diya ki wo ye jata dena chahti hai ki ek uske chale jaane se wo khushiyo se mahroom nahi hui hai...khair apne puraane dino ko yaad karte hue dono ne dhero baatein ki...dheron yaadein taza ki...aur baato-baato 3ri coffee bhi khatam hone ko aayi thi...jab Aaditya ne kaha 'hum dono ek hi sehar me hote hue bhi kitne dino ke baad mil rahe hai...hum chahe to roj mil sakte hai...mai yahi pass waali company me hi kaam karta hu...tum chaho to hum roz shaam ko yahi mil sakte hai aur EK HASEEN SHAAM ek dusre ke saath bita sakte hai...'
Tamanna ke chehre pe koi shikan nahi thi....wo thoda Sa musukurate hue boli 'bilkul unhi dino ki tarah tum wo sab keh gaye jo tumhe thik laga...bina soche..bilkul bebaki se...tumhari yahi aadat mujhe sabse jyada pasand hai...mera matlab thi...dekho Aaditya ab sab kuch pehle jaisa nahi raha...ab mai ek aur bandhan se bandhi hui hu...jisme Vinay ne mujhe kuch bhi karne ki puri aazadi di hui hai....lekin jo raasta ek baar band hokar naye mod pe khul chuka ho us band raaste pe musaafir aksar bhatak jaaya karte hai....mai nahi chahti ki mai ek bhatki hui musafir banu...ahr jaha tak mai tumhe jaanti hu...tum bhi aisa nahi chahoge...hum saath me bhale hi puri zindagi nahi beeta paaye jo mai jaanti hu ki bahut khusi khusi bita sakte the..to kya hua..humne bahut saare khubsurat aur yaadgaar lamhe saath bitaye....ab hum saari umar bus yahi sochkar nahi ji sakte ki wo saath hota to aisa hota..ab mujhe ye sochna hai ki wo yaani Vinay saath hai to aisa hoga aur aisa ho raha hai...aur tumhe ye sochna hai ki wo yaani tumhari life partner aayegi to aisa hoga....ye zindagi itni bhi complicated nahi hai jitna hum ise samjh aur bana lete hai....jo rishta apna safar pura na kar sake use ek khubsurat mod deke khatam kar dena chahiye....aur thank God jo tum mujhe aaj mil gaye...kyunki aaj mai sirf tumhari wajah se puri tarah se Vinay ki ho gayi...kyunki mai chahti thi ki mai ye sab baatein tumse share kar ke ek khubsurat mod de du..aur aaj maine wo kar liya...tumne mujhe apne b'day par ek bahut hi pyara 'return gift' de diya..mujhse jaane anjaane milkar....'
Aaditya coffee ka aakhiri sip liye pichle 25 minute se uski baatein sun raha tha.....aur last me wo thandi ho chuki coffee ko pet ke hawaale karte hue sirf itna hi keh paay..'Tamnna is EK HASEEN SHAAM ko EK BEHTARIN AUR YAADGAAR SHAAM banane ke liye thanx..mujhe mera bahut hi khubsurat gift mil gaya...shayad tumne ab tak jo kaha wo bilkul thik kaha...qki pehli baar mujhe ye sab boring nahi laga...ab shayad mai bhi tumhaari yaado se jin par ab mujhse jyada kisi aur ka haq hai , se aazad hokar kisi aur ke liye sapno ka ek naya mahal khada kar paaunga...thanx...thanx alot.....'

Ab dono coffee shop ke bahar khade ho ek dusre se alag lekin apni manzil ki taraf badhne waale raasto pe ek dusre ko aur ek dusri ki yaado ko alvida keh ke badh chuke the.....
Aur Aaditya yahi soch soch ke khus tha ki uski ye EK HASEEN SHAAM kitni khubsurat thi...kitni dilkash thi.....


ye tha meri kitaab ke puraane dabe panno se nikla ek short story type something...
Jaldi hi fir milte hai...
Ek nayi baat ke saath...
Ek naye din....
Tab tak ke liye Namaskar.. 👋👏👋

Friday 12 December 2014

Roj Ek Baat-001

Chalti ka naam zindagi...

Roj ek baat.....jaisa ki naam khud bayaan karta hai ki roj ki ek baat aur us baat ke piche chupe zazbaat ko share karenge...kyonki naa jaane hum kal ho na ho..par mere dost ye baatein...ye baatein hamesha yahi kahi..inhi fizaaon me gunjti rahengi...mehkati rahengi....
To chaliye aate hai aaj ki baat pe jiska title filmy hai..but ab hai to hai ;-) "CHALTI KA NAAM ZINDAGI"...

Hota kuch yu hai ki hum roz raat ko sapno ki haseen duniya me kho jaate hai...so jaate hai..isi ummid me ki fir ek savera aayega jo hume in sapno ki duniya se jaga kar is zindagi se dobara rubaru karwayega...aur kayi khushqismato ke saath hota bhi yhi hai...subah hote hi daudti bhaagti duniya me ek jagah dekh kar hum bhi usi daud ka hissa ban hi jaate hai hai...chahe man ho ya na ho...by hook or by crook....chaliye ji ab aa gaye is daud me...fir..ab kya??? Aage ka kya ???....
Bus ji jo kar raha hai agla wahi dekh ke hum bhi kar lenge...kyonki agla waala bewkoof to hai nahi jo bus kiye jaa raha hai...ya fir le deke apna ratti do ratti dimaag laga bhi liya to sina do inch chauda kar lenge...ki haanji maine kiya hai wo bhi khud..aur isi ummed me ki kal waala kal ek baar fir aa hi jaayega fir ek baar sapno ki udaan bhar lenge aur so jaayenge...
Lekin kya humne kabhi socha hai...wo kya kehte hai angrezi me...'Logically/Practically' ki roz ek jaisa hi kaam kar kar ke hum kya haasil kar lenge...Mera matlab bus ye hai ki 21 ki umar tak lambe chaude sapno ki ek dukaan bana li...25 aate aate wahi dukaan khud ko hi kiraaye ki dukaan lagti hai...aur 26-27 tak apni jeevan-sangini ke aate hi apni purani 300 square feet ki dukaan bik chuki hoti hai aur hum 30*30 square feet ki kiraye ke sapno ki ek nayi dukaan dekhne lagte hai.....kya bakwaas hai ye...yahi na....
Jaante hum sab hai ki yahi hota hai...par hum duniya ke sabse pyaare aur samjhdaar insaan yaani khud ko hi bewkoof banate rehte hai....ki are nahi 'everything is good...& everything is fine too'...Muflisi me jeena thik..par Mughalte me jeena thik nahi...isliye haalat ki gehraayi ko samjho aur agar wahi puraani type ghisi piti zindagi ji rahe ho to please...upar waale pe thoda ehsaan karo aur khul ke jeena shuru kardo... Coz wo nahi chahega ki usne zo sabse khubsurat chiz banayi wo khud ko dharre ki zindagi pe dhaal de...aur yahi kahe ki sahab kya kare kat rahi hai aur isi 'chalti ka naam to zindagi hai'....
Rules ko maano but flexibly...
Khud ko kaam ke according dhaalo but tabhi tak jab tak tum khul ke saans le paao....warna bina saans liye ji hi nahi paaoge to kaam kaha se karoge...
Apne principles / usool banao lekin kuch is tarah se...kuch aise jo ki tumhe khud ko hi bojh na lagey...
Kuch is tarah se jiyo apni zindagi ki jab wapas us banane waale ke paas pahucho to ye keh sako ki dekho mai khaali hoke wapas aaya hu...tumne mujhe jo kuch diya...wo sab mai wahi uski sahi jagah pe hi kharch karke...wahi unhi logo me baant ke aaya hu..taaki wi banane waala bhi tumpe faqr kare...aur agli baar tumhe aur jyada de...aur keh sake ki 'ISI KA NAAM HAI ZINDAGI '...
shukriya...
milte hai
 ek agli baat ke saath...
ek agle din...